JOULU-EVANJEELIYMMI

Siihen aikhaan tjeisari Aykystys lähätti kynjöörelsin, ette kaikki ala­maiset koko maamassa hääty pan­na verolistoile. Tämä oli ensimäinen verolisto ttaminen ja se tapahtu sillon ko Kviriniys oli Syyrian maaherra. Sillon kai­kin lähit verolistoile pantaviksi, kuki omhaan kaupunkhiin.  Ja Juuseffi, joka oli Taavitin sukuperrää, lähti Kalikan Nasareetista Jyytehaan, Taavitin  kaupunkhiin Peetlehemhiin verolistale pantavaksi. Ma­ria, jonka kansa se oli kihloissa ja joka oli raskhaana, oli sen följyssä.

Ko net olit sielä tuliki synnyttämisen aika; ja se synnytti pojan, esikoisen, se kapaloitti sen ja pani sen soihmeen, ko sielä ei ollu kestikievarissa niile paikkaa.

Ja sillä seu'ula oli joitaki paimenia tok­kaa paimentamassa yölä. Siilon Herran enkeli seiso niitten eessä ja Herran kirkkaus loisti niitten ympärillä ja net pölästyt villisti. Mutta enkeli sano niile: "Älkää pölästykkö! Mie ilmotan teile yhen suuren ilon, joka kuuluu koko kansale. Tänä päivänä oon syntyny teile vapahtaja Taavitin kaupunkissa, Herra. Ja tämä oon teile merkki: tet löyättä äsken syntynheen lapsen, joka oon kapaloituna ja makkaa nyt soimessa." Ja yhtäkkiä siinä oli suuri taihvaalinen jouk­ko, joka ylisti Jumalaa:

"Kunnia Jumalalle korkeuksissa ja rau­haa maan päälä, niile jokka se oon ulosvalinnu."

Ko enkelit olit lähtenheet niitten tyköä ylös taihvaasheen niin paimenet sanot toisil­le: "Lähethään Peetlehemhiin katkoon sitä mitä sielä oon tapah tunnu ja mitä Herra oon meile ilmottannu." Niilä tuli hoppu lähtheen ja net löysit Marian ja Juuseffin ja äskensyntynheen lapsen, joka oli soimessa. Ko net olit sen nähneet, net selitit mitä niile oli sanottu tästä lapsesta. Kaikin, jokka kuulit, ihmettelit mitä paimenheet olit sanohneet. Maria piilotti tämän kaiken syähmeen ja hunteerasi sitä. Ja paimenheet pyörsit takasi ja kiitit ja ylistit Jumalaa siittä mitä net olit saahneet nähhä ja kuula: kaikki oli justhiinsa niinku niile oli selitetty.